विराटनगर । कोशी प्रदेशका मोरङ, सुनसरी र झापा जिल्लामा लामो समयदेखि भइरहेका ट्रान्सफर्मर चोरीका घटनामा संलग्न गिरोह पत्ता लगाउने चार प्रहरी उत्कृष्ट घोषित भएका छन् ।
कोशी प्रदेश प्रहरी कार्यालय विराटनगरले डिएसपी दुर्गाप्रसाद दाहाल, इन्स्पेक्टर सरोज खनाल, प्रहरी वरिष्ठ हवल्दार विष्णु पराजुली र प्रहरी जवान समिप सुब्बालाई ‘साउन महिनाको उत्कृष्ट प्रहरी’ घोषित गरिएको जनाएको हो । उत्कृष्ट घोषित भएका इन्स्पेक्टर खनाल मोरङ प्रहरीमा कार्यरत छन् । यस पटकको अप्रेसनमा समेत उनले महŒवपूर्ण भूमिका निर्वाह गरेका थिए ।
अपराध अनुसन्धान र नियन्त्रणमा असाधारण भूमिका निर्वाह गर्दै आएका प्रहरीलाई प्रत्येक महिनामा उत्कृष्ट प्रहरी घोषणा गर्ने परम्परा रहेको छ । २०८१ साल माघ १५ गतेदेखि विभिन्न समयमा मोरङका १० स्थान, सुनसरीका १२ स्थान र झापाका दुई स्थान गरी जम्मा २४ ठाउँमा ट्रान्सफर्मर चोरी भएका थिए । चोरी घटनाका कारण नेपाल विद्युत् प्राधिकरणको सेवा अवरुद्ध हुनुका साथै स्थानीय बस्तीहरू अन्धकारमा बस्न बाध्य भएका थिए । यी घटनाको गहन अनुसन्धान गर्दै प्रहरीले नेपाल विद्युत् प्राधिकरण प्रादेशिक कार्यालय रानी विराटनगरसँग समन्वय गर्दै विशेष अपरेसन सञ्चालन गरेको थियो । अनुसन्धानको क्रममा चोरीमा संलग्न १२ जनालाई गत साउन ९ गते पक्राउ गर्न प्रहरी सफल भएको हो ।
पक्राउ परेकाहरूसँगै प्रहरीले चोरीमा प्रयोग भएका विभिन्न औजारहरू, ट्रान्सफर्मरबाट निकालिएको ३ सय ६८ किलो ५ सय ग्राम तामाको तार बरामद गरेको छ । साथै चोरीमा प्रयोग गरिएको को.१ च ७७२९ नम्बरको पिकअप गाडी, पाँचवटा मोटरसाइकल र १२ वटा मोबाइलसमेत प्रहरीले सार्वजनिक गरेको छ । प्रहरीको भनाइमा यस्तो सङ्गठित गिरोहले विद्युत् संरचना लक्षित गर्दै चोरी गर्ने कार्यले राष्ट्रिय अर्थतन्त्रमा समेत ठूलो असर पारेको छ ।
