वराहक्षेत्र । वराहक्षेत्र नगरपालिका–१ वराहक्षेत्र मन्दिरवासीहरू कोशी नदीको कटान र पहिरोको दोहोरो मारमा परेका छन् ।
नदीको बहावले जमिन कटान गरेका कारण पहिरो जान थालेपछि मन्दिरवासीमा चिन्ता बढेको छ । नदीको बहावका कारण कोशी नदी र कोकाहा खोलाको सङ्गममा रहेको नाके डाँडा भनिने गरुड पर्वतमा जमिन कटान गरेर पहिरो जान थालेपछि स्थानीय चिन्तित बनेका हुन् ।
वराहक्षेत्र मन्दिरवासी एकातिर पहिरो र अर्कोतिर जमिन कटानको मारमा परेका छन् । नदीको पानीले लगातार जमिन कटान गरेर वराह मन्दिरको उत्तर दिशातर्फ रहेको कोकाह खोलाको पारिपट्टि रहेको नाके डाँडामा करिब अढाई महिनाभित्रमा दुई पटक पहिरो गएको स्थानीयले बताए । पहिरोले डाँडाको करिब १५ मिटर जमिन बगाएको स्थानीयले जनाए । डाँडाको जमिन कटानले गर्दा नदीको पानीको बहाव पश्चिमबाट दिशा बदलिएर मन्दिर रहेको दक्षिणतर्फ बग्न थालेको छ ।
नदीको पानी मन्दिरको तल बगरमा रहेको सिँढीसम्म आउने गरेको छ । यसले मन्दिरसँगै बस्ती बगाउने खतरा बढेको वराहक्षेत्र मन्दिर गुठी व्यवस्थापन समितिका अध्यक्ष भक्तबहादुर श्रेष्ठले बताए । नाके डाँडा कटान गर्दा नदीको बगरमा निर्माणाधीन एक हजार मानिस अटाउने श्राद्धस्थललाई बगाउने खतरा बढेको छ । यसैगरी स्थानीय फुटबल खेल मैदानको केही जमिनसमेत बगाएको श्रेष्ठ बताउँछन् ।
नदीको पानीले मुख्य बस्ती र बजारक्षेत्र रहेको वराहकुट डाँडालाई पनि कटान गरिरहेको छ । बस्ती रहेको डाँडाको तल फेदमा रहेको जमिन पनि कटान गरिरहेको छ । कटान र पहिरो जाने समस्याले वराहक्षेत्र मन्दिरवासीमा त्रास बढेको श्रेष्ठले बताए । नदीको कटान तथा पहिरोको सम्बन्धमा सङ्घका सहरीमन्त्री, राष्ट्रिय योजना आयोग र कोशी प्रदेश सरकारलाई पत्राचार गरेको उनले जानकारी दिए ।
“करिब एक वर्षअगाडि सङ्घीय सरकारको उपप्रधानमन्त्री तथा सहरी विकास मन्त्रीलाई लिखित ज्ञापन–पत्र दिएका छौँ” उनले भने, “राष्ट्रिय योजना आयोग र कोशी प्रदेशको भौतिक पूर्वाधार विकास मन्त्रालयलाई समेत पत्राचार गरेका छौँ ।”
वर्षाले गर्दा नदीमा आउने भेलले काटिरहेको नाके र बस्ती रहेको वराहकुट डाँडालाई बचाउन तत्काल पहल गर्नुपर्ने स्थानीयले माग गरेका छन् ।
