धरान । लकडाउनका कारण रगत अभाव चुलिएपछि सुनसरी उद्योग वाणिज्य सङ्घले बिहीबार रक्तदान कार्यक्रम गरेको छ ।
सुनसरी उवासङ्घको हलमा गरिएको रक्तदान कार्यक्रममा २ सय ६५ युनिट रगत संकलन भएको छ । रक्तदानमा ५५ जना महिलासहित २६५ जनाले रगत दान गरेका थिए । कोरोनाका कारण देशभर लकडाउन भए पछि धरानको रक्तसञ्चार सेवामा रगत अभाव चुलिएको थियो ।
चैत ११ गतेदेखि सुरु भएको लकडाउनका कारण मानिस आवातजावतसमेत ठप्प छ । जसका कारण रक्तसञ्चार सेवाहरूमा रगत अभाव चुलिँदो छ । रक्तदानमा सहभागी गराउनका लागि धरानका विभिन्न क्षेत्रमा एम्बुलेन्समा ल्याइएको कार्यक्रम संयोजक एवम् सुनसरी उवासङ्घका सदस्य प्रभाव खतिवडाले जनाए ।
सबैको साथ र सहयोगले एकैदिनमा यो संख्यामा रक्तदान गर्न सफल भएको उनले बताए । सुनसरी उवासङ्घका अध्यक्ष गिरिधारी सापकोटाले नेपाल प्रहरी, धरान उपमहानगरपालिका तथा नागरिकको सहयोगले नै रक्तदान कार्यक्रम गर्न सफल भएको बताए । उनले सहयोगी सबैलाई धन्यवाद ज्ञापन गरे । बिहान ७ बजेदेखि अपरान्ह ४ बजेसम्म रक्तदान गरिएको थियो ।
रक्तदान कार्यक्रममा पनि सामाजिक दूरी कायम गरिएको थियो । नेपाल रेडक्रस सोसाइटी सुनसरीको प्राविधिक सहयोगमा रक्तदान कार्यक्रम गरिएको हो । धरानमा रक्तसञ्चार सेवा बीपी कोइराला स्वास्थ्य विज्ञान प्रतिष्ठानमा सञ्चालित छ ।
