धरान । धरान–१७ का चार युवाहरूलाई वडा कार्यालय निगरानीमा राखेकाे छ । धरान–१७ लोकप्रिय मार्गका उनीहरू मस्लिमहरुकाे धार्मिक सभामा सहभागी भएकाे अाधारमा निगारनीमा राखिएकाे हाे । वडामा बनेको टोल विकास संस्थाहरूले उनीहरूकाे पहिचान गरेकाे हाे । धरान–१७ मा ३७ वटा टोल विकास संस्था (टिएलओ) रहेका छन् ।
उदयपुरको भुल्केमा १२ जनामा कोरोना संक्रमित भएको थाहा पाएपछि शुक्रबार रातिदेखि टिएलओ सक्रिय रूपमा लागेको थियो । हरेक टिएलओबाट ४ जना आफ्नो टोलमा सामुहिक भेला, विहे, पार्टी, भोजमा सहभागी नहुनका लागि सूचना जाहेर गर्दै आइरहेका थिए ।
उनीहरूलाई वडाको सहयोगमा बीपी कोइराला स्वास्थ्य विज्ञान प्रतिष्ठानमा स्वाब परीक्षणसहित क्वारेन्टाइनमा राख्ने तयारी भइरहेको वडाबासीले नाम उल्लेख नर्गने सर्तमा जानकारी दिएको छ । तर, उनीहरूको अवस्था सामान्य रहेको छ । परीक्षण पश्चात मात्रै कोरोना भए/नभएको खुल्ने छ ।
टिएलओले लकडाउनलाई कार्यान्वयन गर्नका लागि अहिले सक्रिय रूपमा लागेको छ । वडाध्यक्ष सूर्य भट्टराईले फोनसम्पर्कमा भने, ‘सबै सुरक्षाको जिम्मा प्रहरीलाई मात्रै नदिऊँ आफै पनि सहभागी हुनुपर्छ भनेर हरेक टिएलओबाट ४ जनाले आफ्नो टोलको सुरक्षामा खटिएका छन् ।’
अहिले विभिन्न स्थानमा गरिएको टेष्टको क्रममा पोजेटिभ देखिएकाहरुसँग जोडिएकोहरु टोलमा भए नभएको खोजी भइरहेको वडा कार्यलयले जनाएको छ ।
