धरान / लकडाउनको बेला मान्छे नै नचिन्ने गरि रक्सी खाएर बाटोमा लड्ने धरान उपमहानगरपालिकाका सूचना अधिकृत खगेन्द्र खतिवडालाई कारवाही गर्न दवाव परेको छ ।
गत मंसिर १४ गतेको उपनिर्वाचनका मेयरका उम्मेद्वार हर्क साम्पाङले जनताको सेवा गर्ने बेलामा रक्सी खाएर बाटोमा लड्दैं हिड्ने अधिकृतलाई कारवाही गर्न मौखिक रुपमा अधिकृत खतिवडाको हर्कतबारे जानकारी गराएका थिए । जवाफमा मेयर राईले प्रमुख प्रशासकीय अधिकृतलाई स्पष्टिकरण सोध्न निर्देशन दिएको बताएको साम्पाङले बताए । जनताले तिरेको करबाट पालिएका कर्मचारीहरुले यस्तो बाटो बाटोमा रक्सी खाएर लड्न नसुहाउने भन्दैं मेयरलाई कारवाही गर्न सुझाएका छन् । उनले मेयर राईसँग भएको फोन वार्ता सामाजिक सञ्जालमासमेत सार्वजनिक गरेका छन् ।
संघीय लिम्बुवान मञ्चका सुनसरी अध्यक्ष अमर इजमले जिम्मेवार पोष्टमा रहेको व्यक्तिले लकडाउनको बेला मापासे गरेर रातीराती हिड्ने काम गैर जिम्मेबार भएको बताएका छन् । ‘यस्तो महामारीको सामना गर्नु परिरहेको बेला उहाँको नैतिकताले पनि गर्न दिदैंन । घरमै बसेर खाएको भए भइहाल्ने हो ।’–इजमले भने । धरान उपमहानगरका मेयर तिलक राईले उनलाई स्पष्टिकरणसम्म सोध्नु पर्ने उको भनाई छ ।
यस विषयमा प्रमुख प्रशासकीय अधिकृत विदुरप्रसाद खनालले अनलाइनहरुमा हेरेर थाहा पाएको बताए । अनौपचारीक छलफल भएको बताउदैं आफु यस विषयमा बुझिरहेको बताए । ‘सुन्नमा आयो । रक्सी खाएर बाटोमा लडेको कुरा । यस विषयमा प्रहरीसँग बुझेर के गर्ने भन्ने निर्णयमा पुग्छौं ।’–अधिकृत खनालले भने ।
धरान उपमहानगरका राजस्व, सूचना तथा पर्यटन महाशाखा प्रमुखसमेत रहेका खतिवडा गत बैशाख ३ गते राती मादक पदार्थ सेवन गरेर धरान–८ स्थित जिल्ला ट्राफिक प्रहरी कार्यालय अगाडी लडेका थिए । मोटरसाइकल पम्पच्योर भएर लगेका खतिवडा रक्सीले उठ्नै नसक्ने भए पछि ट्राफिकले वडा प्रहरी कार्यालय बुझाएको थियो । उनी रातभरी वडा प्रहरी कार्यालयमा बसी विहान प्रहरीले आफन्तको रोहबरमा घर पठाएको थियो । मापासे जाँचमा मादक पदार्थ सेवन गरेको पाइएको प्रहरीले जनाएको छ ।
यस विषयमा खतिवडाले भने समाचार नै भाइरल भइसककेकाले आफ्नो केही भनाई नभएको बताए । उनले बाइकको टायर पम्पच्योर भएर आफु घर फर्कदैं गर्दा लडेको प्रतिक्रिया दिदैं आएका छन् ।
साना कर्मचारीलाई पाइप, ठूलालाई सम्मान
लकडाउनका बेला कोही नागरिक अत्यावश्यक काम बाहेक हिड्न निषेध गरेको छ । तर लकडाउन कै बेला खतिवडा भने लडेकै थाहा नपाउने गरि मादक पदार्थ सेवन गरेर हिड्दासमेत प्रहरीले ससम्मान घर पठाएको छ । तर सोही दिन एक जना व्यक्तिको उपचारका लागि पानवारी पुगेका धरान उपमहानगरपालिका कै हेल्थ असिस्टेन्ट चन्द्रकान्त खनाललाई भने लकडाउन अवज्ञाको आरोपमा प्रहरी पाइपले हिर्काएको थियो । प्रहरीले पनि ठूला कर्मचारीलाई बचाउने र सानालाई सास्ती दिएको भन्दैं आलोचना भएको छ ।