तरहरा/ वैदेशिक रोजगारीमा लैजाने नाममा सुनसरीमा दर्जनौं युवा ठगिएका छन् । विभिन्न देशमा लैजाने भनेर रकम र राहदानी लगेपछि फिर्ता नगरेको भन्दै सुनसरीका केही युवाले प्रहरी कार्यालयमा उजुरी हालेका छन् । सुनसरीकै अबुल मियाँ बताउने एजेण्ट इनरुवा तथा सो क्षेत्रका युवालाई विदेश पठाउने भन्दै लाखौँ ठगेर फरार भएका छन् ।इनरुवा नगरपालिका–९ का मिश्रीलाल मेहेताले विदेश लैजान्छु भन्दै एजेण्ट
ले ठगेको बताएका छन् । उनले आपूलाई साउदीको सुपर मार्केटमा काम लगाइदिने भन्दै एक वर्षअघि एक लाख रुपैयाँ र राहदानी लगेपनि अहिलेसम्म फिर्ता नगरेको भन्दै जिल्ला प्रहरी कार्यालय सुनसरीमा उजुरी हालेका छन् । भने, ‘मलाई एजेण्टले ठग्नु ठग्यो, न विदेश पठायो न पैसा फिर्ता दियो ।’ साहुको ऋण काढेर विदेश जाने तयारीमा रहेको उनले बल्लबल्ल बनाएको राहदानी समेत गायब गरेको दुखेसो गरे ।
आरोपित मियाँ भने केही समययता सम्पर्कविहीन भएको जिल्ला प्रहरी कार्यालयले जनाएको छ । इनरुवा–९ कै विनोद मेहेता, इनरुवा–७ का सुनिल मण्डल, इनरुवा–९ का चन्दन मेहेता, इनरुवा–२ का शिवनारायण मेहेता लगायतलाई समेत ठगी गरी विदेश नपठाएको र अहिलेसम्म पैसा र राहदानीनै नदिएको भन्दै उनीहरूले दुखेसो गरेका छन् । यस्तै भोक्राह–८ का सलाउदिन अन्सारीले पनि आपूmलाई वैदेशिक रोजगारीमा लैजाने भन्दै ठगी गरेको उजुरी जिल्ला प्रहरी कार्यालयमा दिएका छन् ।
अधिकांश एजेण्टले विदेश पठाउने भन्दै रकम लिने तर प्रमाण नदिने गरेको पीडितहरुले बताएका छन् । देवानगञ्ज–१ का उमेश मेहेताले आपूmलाई एजेण्टले ठगेकै कारण कन्तबिजोक भएको गुनासो गरे । एजेण्टले मलेसिया पठाइदिन्छु भनेपछि एक लाख ३० हजार रुपैयाँ ऋण काढेर दिएको उनले दुखेसो गरे । ‘पैसा फिर्ता गर्छु भनेर कागज समेत गरेको थियो तर अहिले लापत्ता छ’, उनले दुखेसो गरे । उनीहरुसँगै दर्जनांले जिल्ला प्रहरी कार्यालयमा उजुरी दिएको तथ्याङ्क छ ।
वैदेशिक रोजगारीमा लैजाने भनेर ठगी गरेको भन्दै जिप्रका सुनसरीमा धेरै उजुरी परिरहेको एसपी पोषराज पोखरेलले बताए । ‘पैसा दिएको प्रमाण छैन, तर उनीहरूले आपू ठगिएँ भन्दै उजुरी गर्ने गरेका छन्’, पोखरेलले भने, ‘ठगी गर्नेहरु पनि भेटिँदैनन्, भेटिए पनि पीडितहरुसँग प्रमाण नहुँदा समस्या भइरहेको छ ।’
